بند السباكة

 السباكة وماادراك ماهي السباكة
👈 كام حاجة مهمة كده لازم تاخد بالك منها بالك منها قبل ما تبدا تاسيس السباكه
اهم حاجه في السباكه و اول حاجه بيشتغل علي اساسها السباك هو الشرب (و هو ضبط منسوب المواسير اللي علي اساسها بتاع السيراميك بيشتغل ) لو السباك خد شرب غلط او ماظبطش الشرب بتاعه بيحصل مشاكل كتيره بعد كده في منسوب السيراميك وارتفاع الخلاطات و الاحواض
وخلي  بالك الشرب مش بس مهم للسباكة ده كمان مهم اضبط مناسيب تشطيب الشقة كلها
اهم حاجة في الموضوع كله واللي يبينلك السباك كان شغال صح ولا لا انك تجيب الشركه بتاعه المواسير تعمل اختبار ضغط المواسير ( تكبس المواسير ) و تهتم انك تطلب منهم ضمان عشان لو فيه مشاكل تظهر و تلحق تحلها قبل السيراميك 

( و مفيش حاجة اسمها متقلقش علي ضمانتي يا باشا )
لازم تكون مقرر قبل ما تبدا في التاسيس نوع الحوض اللي هتجيبه للحمام (ما تقولش بعد التاسيس هدور واسأل واشوف انهي نوع هجيبه نصيحة بلاش) يعني شوف هتجيب الحوض عمود ولا حوض زاوية او وحده لان كل حاجه ليها طريقة مختلفة في التاسيس 

بقية الحاجات اللي لازم تاخد بالك منها قبل ما تبدا تاسيس السباكه
حاول انك تجيب البانيو في مرحله التاسيس حتي لو هيركب بعد السيراميك عشان تقدر تحدد مكان الصرف بتاعه و تعرف كمان مكان الخلاط و لو عندك محبس دفن هاته في مرحله التاسيس للسباكة بدل متأسس وتفاجئ بان البانيو او التاسيس مش هينفعوا وتعيد الشغل وتكسر ثاني او تلجأ انك تركب حاجة مش عجباك علشان هوا ده اللي هينفع يا اما هتكسر
قرر هتعمل خلاط حوض المطبخ خارج من الحيطه ولا شجره ( يعني طالعه من الرخامه او الحوض ) عشان كل واحد ليه تاسيس مختلف ومش ناقصة مصاريف هيا
ولو ناوي تعمل فلتر تحت حوض المطبخ اسسله من الاول
ممنوع التكسير في أي عامود.

 ( مش علشان نضبط السباكة نأثر علي المبني حتي لو اكدلك انها مفيهاش حاجة اقولوا مش هتبقي احسن من المهندس اللي بناه خليك في مهنتك ).
وبعد ما السباك يخلص لازم تتاكد ان كل المواسير داخله كلها جوا الحائط ( يعني مفيش ماسوره بارزه من الحائط ) عشان لو طالعه من الحائط صنايعي السيراميك هيضطر يربي مونه كتير فالجانب كله 

(علشن يداري الجزء ده و ده ممكن يضيق الحمام او المطبخ غير تكلفة التربية للمونة ) 

ملاحظات سريعة كده علي الماشي 

 من الحاجات المهمة جدا في تاسيس السباكة العزل

 (في بعض السباكين مبيحبوش يعملوه وبيقولوا ملوش لازمة ملناش احنا دعوة بالناس ديه )

خلي بالك كمان ان العزل لازم يتعمل صح علشان لو متعملش صح هيبقي ملوش لازمة 

لازم تبقي عارف قبل ما تبتدي السخانات هتعملها غاز ولا كهرباء عشان بتوع الغاز ليهم شروط معينه ف تاسيس سخان الغاز

 ( الارتفاعات بتختلف فالحالتين ) 

مهم جدا كمان انك تعمل صرف للتكييفات

 ( لو حسيت الموضوع هيكلفك كتير علي الاقل اعمل صرف للغرف اللي متاكد انك هتحط فيها تكييف حاليأ او مستقبليا  ) 

وعلي فكرة بقي لو عايز ممكن تعمل خلاط للقاعده و يكون سخن و بارد و تدلع نفسك و الموضوع مش هيكلفك كتير