بند الكهرباء

بص يا سيدي النهاردة

 هنتكلم عن بند كده من اكتر البنود اللي الناس بتحس انها مش فاهماها وبتسيبها للصنايعية يعملوا اللي هما عايزينه
بص يا سيدي الكهرباء ده بحر كبير اوي فهنحاول نقول علي اقصي معلومات بطريقة سهلة فركز معايا شوية 

اولا : علب الماجيك (علب الماجيك ) العلب دي وظيفتها ايه ؟
وظيفتها انها بتبقي مكان البرايز ( الفيش ) او مفاتيح الانارة بعد كده بتركب علي اساس حاجتين مكان و ارتفاع يعني ايه ؟! بمعني انك لما تيجي تقرر انك هتحط علبة في المكان ده ولاده بيبقي علي اساس الفرش بتاعك يعني انت محتاج علبة هنا علشان مفتاح للنور جنب السرير مثلا متتفاجئش انك عملت علبة وطلعت مكانها ورا الدولاب علشان انت محددتش مكان عفشك من الاول  و بالنسبة للارتفاع العلب بتبقي علي ارتفاع 1.2 م من التشطيب و لو هتعمل علب علي ارتفاع قليل يفضل يبقي ارتفاعها 40 سم بس اوعوا يطلع ورا كومودينو احنا قلنا ايه؟ شوف مكان عفشك بعد كده يا سيدي بتقول للصنايعي انا عايز دي بريزة و ده مفتاح للنجفة و دي فيشة للتلاجة و دي للسخان و دي للتكييف و هكذا حسب الاحتياج طيب دلوقتي انا عندي كذا نوع من الاحمال يعني الانارة و البرايز دي احمال خفيفة و التلاجة و التكييف دي احمال تقيلة ... لما تيجي تتكلم مع الصنايعي لازم تبقي فاهم( علشا تعرف تحاسبه علي الكميات )ان سلك سمك 2 مم كفاية يقدر يشيل احمال البرايز و الانارة .........طيب لو تكييف بقي او تلاجة ... الثلاجة و البوتاجاز يبقي سمك السلك 4 مم و السخان و التكييف يبقي سمك السلك 6 مم  وديه طبعا الاقطار المناسبة للشغل علشان تبقي مأمن نفسك 

خلاص خلصت يا باشا العلب و هبدأ ادق مواسير بقي ... بيجي الصنايعي يجيب مواسير 16 يدقها في الحيطة من العلبة لحد اللوحة الرئيسية ( لوحة التوزيع ) و دي بيبقي اسمها مرحلة ( دق و تركيب ) يجي بعد كده بقي يشد السلك جوه المواسير دي ... السلك ال 6 مم للتكييف و ال 4 مم للثلاجة و هكذا زي ما شرحنا فوق .... طيب بعد كده بقي هيجي مرحلة توصيل السلك علي مفاتيح اللوحة مبدأيا كده سلك التكييف بيبقي علي مفتاح لوحده بخط لوحده خلي بالك الصنايعية بيقولوا عالخط ( لنية ) علشان متحسش انك اجنبي وكمان بيبقي سلك التكييف و السخان و الثلاجة و البوتاجاز و الغسالة كل واحد علي لنية لوحدها
لنية التكييف بتتوصل علي مفتاح 32 امبير و 6 مم سلك ده بيبقي كفاية اوي يشيل تكييف قدرته 2.25 حصان
لنية السخان علي مفتاح 32 امبير و 6 مم سلك والثلاجة و الغسالة و البوتاجاز كل لنية لوحدها بتتوصل علي مفتاح 25 امبير و 4 مم سلك و البرايز و الانارة ممكن تجمع نقطتين في لنية واحدة علي مفتاح 16 امبيرخلي بالك ان اهمية الكلام ده انك تعرف لما الكهربائي هيجبلك ايه بالضبط و ليه

 اخر جزء في بند الكهرباء نركز بقا علشان الكلام كتير هنا  

 الانارة والبرايز ...هنا ممكن اجمع نقطتين علي لنية واحدة و انا مطمن لان احمال الانارة و البرايز مش تقيلة وبيبقي اسلاك الانارة ٢مم و١٦ امبير زي ما قلنا  قبل كده
الكلام اللي جاى للعلم بالشئ بس مهم تبقي عارفه لو ناوي تتابع الصنايعي وتعرف تقدر الكمية والوقت
كل بريزة سواء احمال تقيلة(تكيفات ،سخانات..) او خفيفة بيبقي داخل ليها سلكين واحد تغذية و واحد راجع عالاقل 

 ... التغذية ممكن يبقي لونه احمر او اصفر او ازرق الراجع بيبقي لونه اسود و ده اللي لما بدوس عالمفتاح الدايرة تقفل و اللمبة تنور 
خلي بالك ان في كذا نوع من انواع المفاتيح زي مفتاح الجرس بيختلف عن مفتاح الانارة العادي بيختلف عن مفتاح الدفياتير و ده بيبقي شبه المفتاح العادي لكن توصيلاته بتختلف شوية ....نوصل بقي لآخر و اسهل حاجة اللي هي سلك التليفون الدش دول من المفترض ان بيبقي مرمي ليهم خرطوم في السقف الخرسانة قبل ما يتصب يا اما هضطر ادقلهم خرطوم جديد بيتجمعوا في الآخر علي حاجة اسمها بواط التجميع و من بواط التجميع علي خرطوم بره الشقة و من بره الشقة علي السطح او علي صندوق التليفون في بير السلم
 بعد ما توزع الاحمال علي المفاتيح توزع الاحمال من المفاتيح علي الفازات بالتساوي قدر الامكان ..و الصنايعي اللي يقولك هجمعلك التكييفات كلها علي فازة واحدة ده تجيب صنايعي غيره علي طول  بكده نكون جمعنا اكبر قدر من المعلومات في الكهرباء