بند السيراميك

بند السيراميك من البنود المهمة جدا اللي بتكلف وتصليحها رخم  طب يا عم اعمل ايه فهمني حاضر
لازم تتأكد من افقية سيراميك الارضيات و تستلمه بميزان و رأسية سيراميك الحوائط و تستلمه بميزان المياه
(خلي بالك زوايا التقاء السيراميك لو زاوية بارزة ( زي زاوية عمود مثلا ) بيتركبلها زوي ( جمع زوايا  عشان متبقاش زاوية حادة تعور حد لو  خبط فيها
خلي بالك كويس جداااااااا من سقية السيراميك بالاسمنت الابيض و ده بيملي العراميس اللي بين كل بلاطة و التانية
الصنايعي و هو شغال و لسه بيركب اتأكد انه بيغطس البلاطة في مياه عشان البلاطة متشربش مياه المونة و تحتها يبقي مطبل
طب اعرف بقي ازاي ان الشغل اتركب صح وانه مش مطبل ؟؟
لو سيراميك ارضية خبط عالسيراميك و انت ماشي بكعب رجلك و لو سمعت صوت زي ما بتسمع و انت بتخبط علي دولاب خشب مثلا او حاجة مفرغة يبقي ده مطبل، بالنسبة للحيطان خبط عليها بايدك كأنك بتخبط علي باب و لو مطبل هيعمل برضه نفس الصوت
بكره هنكمل بند السيراميك علشان في حاجات كتيرة لسة متقلتش
اتأكد ان في ميل معمول في الحمام بنسبة 1% ناحية البيبة ( البلاعة )  عشان المياه تجري عليها علي طول

 (اوعي تنسي التفصيلة ديه في الحمام علشان التصريف)
قبل ما تركب السيراميك اعرف مقاس البلاطة الاول و بعدين شوف الطول او العرض اللي هتركب فيه السيراميك يعني مثلا لو عندك بلاطة 60*60 و ريسبشن طوله 6 متر مثلا يبقي انت محتاج 10 بلاطات
و لما تضرب الطول في العرض و تطلع المساحة تقسمها علي مساحة البلاطة تعرف انت محتاج كام متر سيراميك و متنساش تحسب الوزر معاك و اللي بيكون عرضه 10 سم و طوله طول البلاطة
طيب لو الريسبشن طوله مكنش 6 متر بالظبط اعمل ايه ؟
*  ساعتها بيبقي في جنب فيه جزء من البلاطة و دي بنسميها غلايق  * الاجزاء المتبقية من السيراميك 
طب الغلايق دي يفضل اركبها فين؟
طبعا يفضل اركبها في مكان ميكسرش العين يعني مركبهاش في وش الباب مثلا و نفس الكلام بالنسبة للحوائط متعملش غلايق تحت خليها فوق بعيد عن العين
في حاجة مهمة جدا في السيراميك و هي فواصل الغرف يعني ايه خلي بالك علشان دي بتلغبط ناس كتير وبيسألوا لو عندي سيراميك مختلف للصالة مثلا وغرف النوم او الحمام والطرقة مثلا اوقف سيراميك الصالة لحد فين وابتدي سيراميك الغرف من اول فين
اقولك تعالي نتعب مع بعض شوية و نتخيل انك داخل من الطرقة لغرفة المعيشة هتلاقي اكيد في باب .... بص علي حلق الباب هتلاقي في جزء بارز و ده اللي المفروض ننهي عنده سيراميك الطرقة و نبدأ سيراميك الاوضة الجديدة بالسيراميك الجديد  طيب الحتة البارزة دي بتبقي قد ايه؟؟!! 

بتبقي في حدود تقريبا 10 سم
خد بالك ان تبقي العراميس قد بعض و علي استقامة واحدة و دي بنستخدملها زوي بتتشال بعد ما المونة تنشف
خلي بالك متمشيش عالسيراميك و المونة لسه طرية عشان متبوظش وزنة البلاطة  و لو عايز تمشي خلي الصنايعي يحطلك بلاطة مقلوبة و امشي عليها و دي بيبقي اسمها تربيعة