بند المحارة

المحارة بند من اهم بنود التشطيبات 

لان اي عيب فيه بيظهر في النقاشة مش بس كده ده كمان في اختلاف طريقة استلامة بين الناس ومبيبقوش عارفين الصنايعي كده شغال صح ولا غلط 

وهل اللي بيعملوا الصنايعي كفاية ولا لأ لو عايز شغل صح (وخلي بالك انا بكلمك في الصح مليش دعوة بالي بيتعمل )الشغل علشان يبقي صح لازم الصنايعي يسلمك بؤج و اوتار و تأكيس و تربيع ايه يا عم الكلام ده مش اتفقنا هنتكلم عربي يعني ايه الكلام ده كله واحدة واحدة اول خطوة خالص بعمل طرطشة و دي بتبقي طبقة خشنة فوق المباني عشان مونة المحارة تمسك كويس البؤج بتبقي زي اللي في الصورة كده بنعمل كذا واحدة في الحيطة بنشد عليها خيوط اسمها اوتار عشان نتأكد ان البؤج كلها ماشية وش واحد و بعدين بنجيب دراع و ميزان مياه زي ما شرحنا في بند المباني عشان نتأكد ان البؤج افقية و رأسية طب لو تمام ساعتها المحارة بتملي الفراغات ما بين البؤج وتبقي في نفس الاستواء التأكيس هو انك تشد خيطان في الشقة كلها من الريسبشن لطرقة التوزيع للغرف الداخلية و تتأكد ان الخيطان كلها عمودية علي بعضها وبالتالي الشغل مظبوط التربيع هو انك تقيس مقاس في اول الاوضة وتروح تقيس في اخرها بالطول و بالعرض و تتاكد ان المقاس هو هو كده يبقي الشغل سليم خلي بالك مش لازم كل ده يتعمل في الشغل برة مع انه الاصح بس ساعات الناس بتحب توفر